बर्दियामा कोभिड–१९ संक्रमितको संख्या बढ्दै जाँदा बाँके स्थित भेरी अस्पतालमा स्वाब परीक्षणको नतिजा ढिलो आउन थालेपछि जिल्लामै पीसीआर परीक्षण प्रयोगशाला खोल्ने तयारी गरिएको छ । बर्दियाका प्रमुख जिल्ला अधिकारी लिलाधर अधिकारीको अध्यक्षतामा बसेको जिल्ला विपद ब्यवस्थापन समितिको निर्णयले प्रयोगशाला संचालनमा ल्याउने तयारी गरिएको हो । 

स्वाब परीक्षणका लागि पठाईएका नमूनाहरुको नतिजा आउन ५ देखि १० दिन लागेपछि जिल्लालाई कोरोनामुक्त बनाउने लक्ष्य पूर्तिगर्न जिल्लामै ल्याव आवस्यक पर्ने ठहर समितिको छ । गुलरियामा अवस्थित साविक महिला तथा बालवालिका कार्यालयको भवनमा प्रयोगशाला राख्ने तयारी गरिएको छ । प्रयोगशालाको खर्च ब्यवस्थापनका लागि गुलरिया नगरपालिकाबाट ४० लाख र अन्य पालिकाहरुबाट २०/२० लाख रुपैया प्रकोप ब्यवस्थापन कोषको खातामा जमा गर्ने निर्णय भएको जिल्ला प्रशासन कार्यालय बर्दियाले जनाएको छ ।

समितिले प्रयोगशाला संचालनका लागि ५ नम्वर प्रदेस सरकारबाट १ करोड पीसीआर औजार उपकरण खरिदका लागि माग गर्ने तयारी गरेको छ । त्यस्तै पूर्वाधार विकास साझेदारी कार्यक्रमबाट बचेको रकम सहयोग गर्न जिल्लाका २ वटै संघीय साँसदहरुसँग अनुरोध गर्ने निर्णय समितिको छ । समितिले प्रयोगशाला संचालनका लागि असार १५ गते भित्र स्थानिय पालिकासँग सहयोगका लागि प्रतिवद्धता माग गरेको बताईएको छ । 

लेखकको बारेमा

बर्दिया न्युज